ھاوکات لەگەڵ ئێعدام کردنی سێ لاوی کورد بە ناوەکانی رامین حسێن پەناھی، زانیار و لوقمان مورادی لە بەرەبەیانی ئەمڕۆدا بە تاوانی ئەندام بوون لە کۆمەڵە، بنکە و بارەگاکانی حیزبی دێمۆکراتیش کرایە ئامانجی ھێرشەکانی رژیمی نگریسی ئیسلامی ئێران و بەداخەوە دەیان کادری رێبەری و پێشمەرگە گیانیان بەخت کرد و بریندار بوون.
بێ گومان مێژووی گەلی کورد و بەتایبەتی گەلی کوردی بندەست لە رۆژھەڵات، پڕە لەو رۆژە تاڵ و ناخۆشانەی کە لەگەڵ دەرکەوتنی تیشکی ھەتاو و یەکەم گزنگی بەرە بەیان، دڵی پیر و لاوی ئەم وڵاتە خەمبارە بە بیستنی ھەواڵێکی دڵتەزێن خورپەی لێ ھاتووە و ھەژاوە.
بەڵام ئەم جارە کۆستەکە گەڵێک دڵتەزێنترە، چوونکە لە سەردەمی تێکنۆلۆژیا و پێشکەوتنی ھەموو ئامێرێکی زانیاریی گەیاندنی خێرا و دەستبەجێ بە مرۆڤ و لە بەر بینگی ھەموو چاو و گوێیە کپ کراوەکانی جیھانەوە، لاوی کورد لە سێدارە دەدرێت و بنکە و بارەگای حیزبی کە شوێنی نیشتەجێ بوونی ژن و منداڵە و نێو دڵی شارەکاندایە، دەدکرێتە ئامانج و کۆماری ئیسلامی بێ شەرمتر لە ھەموو کاتێک و لە ھەموو شوێنێکدا دەست دەداتە قات و قڕ کردنی خەڵکی کوردستان.
ئەم ھەوڵە دزێو و قێزەونانەی کوماری جینایەتکاری ئیسلامی لە کاتێکدایە، کە ھەموو ھەوڵ و تەقالاکانی رژیمی ئێران بۆ دەستێوەردان لە کار و باری وڵاتانی ناوچەکە لەگەڵ شکست و ھەرەس ھێنان رووبەڕوو بووەتەوە و ئەم رژیمە لە ھەموو بوارێکدا لە ئاستی ناوچەیی و نبودەوڵەتی تووشی شکست بووە و وەک تایبەتمەندیی ھەمیشەیی خۆی، ھەر کات لە دەرەوەی سنوورەکان تووشی شکست و دۆڕان دەبێت، تۆڵەی شکستەکانی لە خەڵکی ئێران و بەتایبەت گەلی کورد و شۆڕشگێڕەکانی دەکاتەوە.
ئێمە وەک رێکخراوی لاوانی پێشڕەو، وێڕای مەحکوم کردنی ئەم کوشت و بڕ و دەستدرێژیە بێ بەزەییانەی کۆماری ئیسلامی، لەگەڵ ھەموو گیانبەختکردووانی بزووتنەوەی مافخوازانەی کوردستان پەیمان تازە دەکەینەوە، کە تا دوا ھەناسە لە بەرانبەر رژیمی داگیرکەری کۆماری ئیسلامی خەبات دەکەین و بۆ گەیشتن بە رزگاریی خەڵکی چەوساوە و بەشمەینەتی کوردستان لە ھیچ ھەوڵ و تێکۆشانێک سڵ ناکەینەوە.
یادی ھەموو گیانبەختکردووانی بزووتنەوەی شۆڕشگێڕانەی کوردستان بەرز و بەڕێز بێت
مەرگ و نەمان بۆ کۆماری جینایەتکاری ئیسلامی
رێکخراوی لاوانی پێشڕەو
١٧ی خەرمانانی ١٣٩٧ی ھەتاویی
٨ی سێپتامبری ٢٠١٨ی زایینی
