بەبۆنەی ماڵئاوایی لەژیان كردنی بەڕێز مام جەلال تاڵەبانی، سكرتێری گشتیی یەكێتیی نیشتمانی كوردستان لە كوردستان‌و چەندین شوێنی وڵاتانی ئوروپایی رێوڕەسمی پرسە‌و سەرەخۆشی بەڕێوەچوو كە هاوڕێیانی كۆمەڵەی زەحمەتكێشانی كوردستان لەزۆربەیاندا بەشداربوون.
رۆژی هەینی وەفدێكی كۆمەڵە بەشداری لە مەراسیمی ناشتنی تەرمی مام جەلال لە گردی دەباشانی شاری سلێمانی كرد. بۆ رۆژی دواتر وەفدێكی دیكەی كۆمەڵە بە سەرپەرشتی هاوڕێ رەزا كەعبی، بەرپرسی دەستەی كارگێڕی كۆمەڵەی زەحمەتكێشانی كوردستان بەشداری لە مەراسیمی پرسە‌و سەرەخۆشی لەشاری سلێمانی كرد.
هەر هەمان رۆژ وەفدێكی كۆمەڵە بە سەرپەرشتی هاوڕێ جەعفەر محەمەد ئەمینی، ئەندامی كۆمیتەی ناوەندیی‌و بەرپرسی هێزی پێشمەرگەی كۆمەڵە لەسەر سنور، بەشداری رێوڕەسمی پرسەی مام جەلال لە دەڤەری باڵەكایەتی كرد‌و پەیامی سەرەخۆشی خۆیان ئاراستەی بەرپرسانی یەكێتی كرد.
لەشاری كۆیەش، وەفدێكی كۆمەڵە بەشداری رێوڕەسمەكانی پرسەی مام جەلال كرد‌و پەیامی هاوخەمی كۆمەڵەی زەحمەتكێشانی كوردستانیان ئاراستەی بەرپرسانی یەكێتیی نیشتمانیی كوردستان لەو ناوچەیە كرد.
هەر لەم پەیوەندەدا رۆژی 8ی ئۆكتۆبری وەفدێكی كۆمەڵەی زەحمەتكێشانی كوردستان (كۆمیتەی ئاڵمان) بەشدارییان لە كۆڕی ماتەمینی بەڕێز مامەجەلال كرد كە لەشاری كۆڵن ساز كرابوو.
هەر لە ئاڵمان، دوانیوەڕوی رۆژی یەکشەممە ٨.١٠.٢٠١٧ دەستەیەک لە کادر و ئەندامانی کۆمەڵەی زەحمەتکێشانی کوردوستان لە شاری هانوفێری وڵاتی ئاڵمان بەشداریان کرد لە رێوڕەسمێکدا کە بە بۆنەی کۆچی دوایی مام جەلال تاڵەبانی سەروک کۆماری پێشووی عێراق و سکرتێری گشتی یەکێتی نیشتمانی کوردوستان ساز درابوو. لەم کۆڕە ماتەمینەدا پەیامی کۆمیتەی ئاڵمانی کۆمەڵە بە بۆنەی کۆچی دوایی مام جەلال پێشکەش بە بەشداربووان کرا کە تێیدا وێڕای سەرەخۆشی لە بنەماڵەی تاڵەبانی و یەکێتی نیشتمانی، چەند دەیە خەبات و تێکوشانی ئەم سەرکردە مەزنە بەرز نرخێندرا.
