بەشداریی بەرینی خەڵکی ڕۆژهەڵاتی کوردستان لە مانگرتنی گشتیی ڕۆژی ٢١ی خەرمانان بەڵگەیەکی دیکەیە بۆ ورەبەرزی و دلێریی خەڵکی کوردستان. خەڵکی ڕۆژهەڵاتی کوردستان لەمڕۆژەدا نیشانیاندا وەکوو ٤٠ ساڵی ڕابردوو بەرانبەر بە سەرەڕۆیی و ملهۆڕیی کۆماری ئیسلامیی ئێران بێدەنگ نابن و یەکگرتووانە بەرانبەر بە دیکتاتۆری و دەسەڵاتی تیرۆریستی ئیسلامیی ئێران هاتنەدەنگ و هاوپشتیی خۆیانیان نواند.
خەڵکی ڕۆژهەڵاتی کوردستان بە مانگرتنی سەرتاسەریان دیسانەوە وەکوو سەرەتای هاتنەسەرکاری کۆماری ئیسلامیی ئێران دەنگی نا یان دا بە دیکتاتۆری و تیرۆر و دەسەڵاتی دواکەوتووی کۆماری ئیسلامیی ئێران. ناڕەوا بوونی ئەم دەسەڵاتە و نەخوازراوبوونی کۆماری ئیسلامیی ئێران لە کوردستان دیسانەوە بە دەنگی بەرزی جەماوەری یەکگرتوو هاوارکرا.
ئەم هاوپشتی و بوێری و دلێرییەی خەڵکی ڕۆژهەڵاتی کوردستان بەرانبەر بە یەکێک لە دڕندەترین دەسەڵاتەکانی مێژووی هاوچەرخ نواندیان، جێگەی ڕیز و پێزانین و پیرۆزباییە. ئەمڕۆ خەڵکی ڕۆژهەڵاتی کوردستان بە سینگی ڕووت لەبەر نێزەی ڕووتی ستەم سپەرداربوون، ئەمڕۆ خەڵکی ڕۆژهەڵاتی کوردستان نیشنیاندا چۆن بژی لە چەندە بژی بۆیان گرینگترە و وەکوو هەموو ساڵانی دەسەڵاتی ڕەشی کۆماری ئیسلامیی ئێران ئامادەن لە گیان و ماڵی خۆیان مایە دانێن بۆ بەرگری لە مافە ئینسانییەکان و هەڕەشە و هێزی پڕچەکی سوپای داگیرکەر ناتوانێ ئیرادەی پۆڵایینیان بشکێنێ.
ئەم مانگرتنە هاوکات پەیامێکی پێیە بۆ حیزبە سیاسییەکانی ڕۆژهەڵاتی کوردستان، پەیامی هاوپشتی و هاوکاری کە ڕەمزی سەرکەوتنە بەرانبەر بە کۆماری ئیسلامی. خەڵکی ڕۆژهەڵات دیسان نیشانیاندا کاتێک حیزب و لایەنە سیاسییەکانی کوردستان یەکگرتووانە کاردەکەن بۆ بەرپەرچدانەوە پیلانەکانی کۆماری ئیسلامی و کاتێک بەشێوەی هاوبەش بەرەوڕووی ستەمکارییەکانی کۆماری سێدارە دەبنەوە خەڵکیش بە ورەیەکی بەرزتر و ئیرادەیەی بەهێزتر دێنە مەیدان و ئامادەی فیداکاریی زیاتر و خۆبەخشیی زیاترن.
مانگرتنی خەڵکی ڕۆژهەڵات پەیامێکیشی بۆ ئەو کەسانە پێبوو کە دەیانەوێ ڕەوایەتی تێکۆشانی خەڵکی ڕۆژهەڵاتی کوردستان و ٤٠ ساڵ هاواری حەقخوازی و ئازادیخوازی ئەو گەلە و گیانبەختکردنی هەزاران خەباتکاری ئەو ڕێگایە بکەنە قوربانیی مەسڵەحەتەکانیان.
کومیتەی ناوەندیی کۆمەڵەی زەحمەتکێشانی کوردستان وەکوو یەکێک لەو حیزبە سیاسیانەی چالاکانە بەشدار و پشتیوانی بانگەواز و ڕێکخستنی ئەم مانگرتنە بوو، سەری ڕێز بۆ ئیرادە و بوێری خەڵکی ڕۆژهەڵاتی کوردستان دادەنەوێنێ و پیرۆزبایی گەرمیان لێدەکا و بەڵێنیان لەگەڵ تازەدەکاتەوە کە هەموو هێز و توانای خۆی بۆ ڕزگاری خەڵکی چەوساوەی کوردستان لەدەسەڵاتی دواکەوتی کۆماری ئیسلامیی ئێران بخاتەگەڕ و هەوڵی تەواو بۆ هاوکاریی بەرینتری حیزبەکانی ڕۆژهەڵاتی کوردستان بدات. ئێمە چڕکردنەوەی ئەو هەوڵە بە باشترین سپاس و پێزانین بۆ دلێری و نەترسیی خەڵکی مانگرتووی ڕۆژهەڵاتی کوردستان دەزانین.
سەرکەوێ بزووتنەوەی ڕزگاریخوازانە و ئازادیخوازانەی گەلی کورد
بژی هێزی جەماوەری یەکگرتوو بەرانبەر بە دیکتاتۆری و دواکەوتوویی
کومیتەی ناوەندیی کۆمەڵەی زەحمەتکێشانی کوردستان
٢١ی خەرمانانی ١٣٩٧ی هەتاوی
