بە گوێرەی هەواڵێک کە لە شاری سنەوە گەیشتووە ،بەداخەوە رۆژی شەممە ٤ی گوڵانی ١٤٠٠ی هەتاوی دایە حەمیدە محەمەدی لە تەمەنی ٩٣ ساڵیدا ماڵئاوایی لە ژیان کردووە. دایە حەمیدە دایکی پۆلێک لە تێکۆشەرانی کۆمەڵەیە کە بەشێک لە باشترین ساڵەکانی تەمەنیان لە پێناو شۆرشی چەوساوەکانی کوردستاندا تەرخانکردووە. حەمیدە خانم دایکی هاورێ فەرزاد محەمەدی ئەندامی کۆمیتەی ناوەندیی کۆمەڵە و هەروەها دایکی هاورێیان جەبار و فەردین محەمەدی و دایە گەورەی هاورێیان وریا محەمەدی و زانیار حسین پەناهی لە تێکۆشەرانی دێرین و ناسراوی کۆمەڵە بوو.
دایە حەمیدەش وەک زۆربەی دایکانی ئەم کوردستانە بە پێشکەشکردنی جگەرگۆشە و رۆڵەکانی خۆی بە کۆمەڵە و بزووتنەوەی شۆرشگێرانەی کوردستان بووەتە خاوەنی لاپەرەیەکی زێرینی مێژووی جووڵانەوەی رزگاریخوازی گەلی کورد. دام و دزگا سەرکوتگەرەکانی رژیمی کۆماری ئیسلامی بەرادەیەک لە ورە و ئیرادەی دایە حەمیدە نیگەران بوون کە هەرەشەی لێ سەندنەوەی پاسپۆرت و پێشگرتن لە سەفەر و چوونەدەرەوەی وڵاتیان لێدەکرد.بەڵام هەموو جارێک بەوپەری سەربەرزی و سەرکێشییەوە پارێزگاری لە نازناوی” دایکە سنەیی” دایکانی پێشمەرگەی کۆمەڵە دەکرد.
زۆر بەداخەوە ئەم دایکە خۆراگرە سەرنجام بەهۆی چوونەسەری تەمەن و نەخۆشییەوە لە تەمەنی ٩٣ ساڵیدا دڵە گەورە و پر لە هیواکەی بۆ هەمیشە لە لێدان کەوت و کۆمەڵە و ئازیزانی بەجێهێشت.
ئێمە بەم بۆنەوە لە لایەن هەموو ریزەکانی کۆمەڵەوە سەرەخۆشی لە هاورێ فەرزاد محەمەدی ئەندامی کومیتەی ناوەندی و هەروەها هاوڕێیان جەبار، فەردین، وریا و زانیار و هەموو ئەندامانی بنەماڵەی بەرێزیان دەکەین و خۆمان بەشەریکی خەمیان دەزانین.
یادی ئازیزی دایە حەمیدە محەممەدی بەرزوبەرێز بێت.
سکرتاریەتی کۆمەڵەی زەحمەتکێشانی کوردستان
٤ی گوڵانی ١٤٠٠ی هەتاوی
٢٤ی ئاوریلی ٢٠٢١ی زایینی
