بەرێز عومەر ئێلخانیزادە، سکرتێری گشتی کۆمەڵەی زەحمەتکێشانی کوردستان
ھاوڕێیانی بەڕێزی کۆمیتەی ناوەندی کۆمەڵەی زەحمەتکێشانی کوردستان
سڵاوێکی گەرم
لە ڕێکەوت شەشی ڕەزبەڕی(٢٨ی سێپتامبر) ئەمساڵ رژیمی کۆماری ئیسلامی ئێران ھێرشێکی بەرفراوانی بۆ سەر بنکە و بارەگاکانی کۆمەڵەی زەحمەتکێشانی کوردستان و ھێزەکانی دیکەی رۆژھەڵاتی کوردستان و ھەروەھا قوتابخانە و شوێنی نێشتەجێ بوونی خەڵکی مەدەنی ئەنجامدا کە بەداخەوە ژمارەیەک لە پێشمەرگە و ھەروەھا خەڵکی مەدەنی و ژن و مندال شەھید و بریندار بوون. لێرەدا وێرای شەرمەزارکردنی ئەو ھێرشە داگیرکاری و نامرۆڤانەیە، بەڕێزەوە یادی شەھیدە سەربەرزەکان دەکەینەوە، پرسە و سەرەخۆشی خۆمان ئاراستەی ئێوەی بەڕێز و ھەموو ئەندام و لایەنگرانی کۆمەڵە دەکەین و ھیوای چاکبوونەوە بۆ ھەموو بریندارەکان دەخوازین.
لە دوای شەھیدکردنی ژینا ئەمینی لە لایەن پۆلیسە بێرەوشتەکانەوە، گەلی کورد و ھەموو گەلانی ئێران بە دروشمی” ژن، ژیان، ئازادی” ڕوبەڕووی ئەم رژیمە سەرکوتگەرە بوونەوە و بە سەرھەڵدانێکی سەرتاسەری کە تا ئێستاش ھەر درێژەی ھەیە و بە پێشکەشکردنی سەدان شەھید و بریندار و زیندانی سووربوونی خۆیان لە داخوازی ژیانێکی ئازاد و دیموکراتی بۆ ھەموو گەلان و چین و توێژەکانی کۆمەڵگای ئێران ڕاگەیاند. ئەم سەرھەڵدانە لە مێژووی ھاوچەرخی ئێراندا بێ وێنەیە و ھەموو سیاسەت و کردەوەکانی ئەم رژیمە بۆ کۆمەڵگای ئێران راگەیاند. ئەم سەرھەڵدانە لە مێژووی ھاوچەرخی ئێراندا بێ وێنەیە و ھەموو سیاسەت و کردەوەکانی ئەم ڕژیمە بۆ درووستکردنی دوژمنایەتی لە نێوان گەلان و لە نێوان چین و توێژەکان و لە نێوان رەگەزەکان پووچەڵ کردەوە. ھەر بۆیە ھەموو گەلانی ئران لە فارس و ئازەری و عەرەبەوە بگرە تا بەلووچ و تورکەمەن و گیلەک لە کەسایەتی شەھید ژینادا لە گەلی کورد بە خاوەن دەرکەوتن. بە تایبەت ژنان و گەنجانی ئێران، کە زۆرترین زوڵم و ستەمیان لێکراوە و لە مافەکان و ناسنامەی خۆیان بێبەش کراون، ھەموو ئەو ھێمایانەی کە زیاتر لە چل ساڵە بە سەر مێشک و ھەست و جەستەیدا دەسەپێندرێت رەتکردەوە و بوونە پێشەنگی تێکۆشانی ئازادی و دێمۆکراسی.
رژیمی کۆماری ئیسلامی بۆ ئەوەی یەکێتی گەلان و تێکۆشانی ھاوبەشی ھەموو چین و توێژەکان ھەڵوەشێنێتەوە، دەستی کرد بە چەواشەکاری کە گوایە ناووندی ئەم سەرھەڵدانە کوردستانە و حیزبە کوردییەکانی رۆژھەڵات ئاراستەی دەکەن و لە لایەن ھێزە نێودەوڵەتییەکانی نەیاری ئێرانەوە پشتیوانییان لێ دەکرێت. ھەر بۆیە زۆرترین سەرکوت و کوشتار و ئەشکەنجەیان لە کوردستان ئەنجام دا و دەستیان کرد بە مۆشەکباران کردن و تۆپبارانکردنی بنکە و بارەگاکانی حیزبەکانی رۆژھەڵاتی کوردستان . بێ گومان ئارمانجی ئێران لەم تۆپباران و مۆشەکبارانکردنەدا گواستنەوەی قەیرانە ناوخۆییەکانە بۆ دەرەوەی ئێران و تۆمەتبارکردنی کوردە بە جوداخوازی و تێکدانی ئەمنیەت و یەکپارچەیی ئێران. ھەروەھا ئارمانجی ئەوەیە کە دەستکەوتەکانی کورد لە باشووری کوردستان لە ناو ببات. ئەگەر کۆمەڵگای نێودەوڵەتی، دەوڵەتی ئێراق و ھێزە کوردییەکان لە بەرامبەر ھێرش و بۆردمانەکانی دەوڵەتی تورکیا کە لە ٢٠١٥ وە تا ئێستا ھەموو رۆژێک بەردەوامە ھەڵوێستیان وەربگرتبایا، ئەوا رژیمی کۆماری ئیسلامی ئاوا بە ئاسانی نەیدەوێرا ئەم ھێرشانە بۆ سەر باشووری کوردستان ئەنجام بدات و کۆمەڵکوژی ئەنجام بدات. ھەر بۆیە تاکە رێگای وەڵامدانەوە و پووچەڵکردنەوەی ئەم ھێرشانە پتەوکردنی یەلێتی نەتەوەیی لە ھەر چوار بەشی کوردستان و یەکھەڵوێستی و یەکدەنگییە بەرامبەرداگیرکەران.
جارێکیتر وێرای شەرمەزارکردنی ھێرشەکانی رژیمی کۆماری ئیسلامی، لە سەر ناوی ھەموو بەڕێوەبەر و ئەندامانی کۆما جڤاکێن کوردستان KCK- پرسە و سەرەخۆشی خۆمان پێشکەش دەکەین و یادی شەھیدە سەربەرزەکان بەرز و پیرۆز رادەگرین و ھیواخوازی ھەرچی زووتر چاکبوونەوەی بریندارکانین.
شەھید نامرن، شەھید نامردن، شەھید نامردن
ژن، ژیان ، ئازادی
ھاوسەرۆکایەتی کۆنسەی بەڕێوەبەری کۆما جڤاکین کوردستان
١٢ی رەزبەری ٢٠٢٢
