بە گوێرەی هەواڵێک کە لە شاری سنەوە گەیشتووە،بەداخەوە کاتژمێر حەوتی سەرلەبەیانی ئەمرۆ پێنجشەممە٣٠ی مانگی رێبەندان،زەمانە خانمی کەنعانیان دایکی هاورێی گیانبەختکردوو “مادح ئەرەکەش” بە هۆی نەخۆشی و چوونەسەری تەمەن دڵە گەورە و پر لە خۆزگە وئاواتەکەی بۆ هەمیشە لە لێدان کەوت و ئازیزانی بەجێهێشت.
دایە زەمانە لە ریزی ئەو دایکە تێکۆشەرانەی کوردستانە کە بە بەخشینی جگەرگۆشەکەی لە پێناو شۆرشی رزگاریخوازانەی کوردستاندا، بۆ هەمیشە ناوی لە لاپەرەکانی زێرینی مێژووی پر لە سەرەوەری گەلەکەماندا بە زیندوویی دەمێنێتەوە. گیانبەختکردنی هاورێ مادح کە لە ریزی پێشمەرگەکانی گوردانی قارەمانی شوان و لە شەر و تێکهەڵچوونێکدا لەگەڵ هێزە سەرکوتگەرەکانی کۆماری ئیسلامی گیانی بەختی رێبازی پیرۆزی کرد،دایە زەمانەی ئەوەندەی تر لەسەر هەڵوێست و پاڵپشتیکردنی کۆمەڵە و بزووتنەوەی رزگاریخوازانەی کوردستان سوورتر و لێبراوتر کردو،وەک دایکێکی دڵسۆز و تێکۆشەر و دڵ پر لە هیوای سەرکەوتن جێگای رێز و خۆشەویستی خەڵکی شاری سنەی سەربەرز بوو.
بەداخەوە چوونەسەری تەمەن و لەم دواییانەشدا نەخۆشی لەبیرچوونەوە مەجالی نەدا دایە زەمانە بۆ ماوەیەکی زیاتر لەگەڵمان بژی و، بەداخەوە بەرەبەیانی ئەمرۆ بۆ هەمیشە چاوە چاوەروانەکانی لێکنا و بەجێیهێشتین.
ئێمە بە بۆنەی ماڵئاوایی لەژیانکردنی دایە زەمانە کەنعانیان، لە لایەن هەموو ریزەکانی کۆمەڵەوە پر بەدڵ سەرەخۆشی لە بنەماڵە و کەس وکاری دایە زەمانە و هەموو خەڵکی تێکۆشەری شاری سنە دەکەین و خۆمان بە شەریکی خەم و پەژارەیان دەزانین.
کۆمەڵەی زەحمەتکێشانی کوردستان
٣٠ی رێبەندانی ١٣٩٩ی هەتاوی
١٨ی فێورییەی ٢٠٢١ی زایینی
