کونفرانسی گشتیی ئەندامانی کۆمەڵەی زەحمەتکێشان لە وڵاتی سوئد بە بەشداری زۆرینەی ئەندامان لە شاری ستۆکهۆڵم بەڕێوەچوو .
کونفرانسەکە بە سروودی بانگەواز سروودی ڕەسمیی کۆمەڵەی زەحمەتکێشانی کوردستان دەستی پێکرد و دواتر دەقیقەیەک بێدەنگی بۆ ڕیزگرتنی لە یادی گیانبەختکردووانی کۆمەڵە و هەموو ئەوانەی بۆ ئازادی و عەداڵەتی کۆمەڵایەتی و لە ڕێگەی بزووتنەوەی شۆڕشگێڕانەی گەلی کورددا گیانیان بەختکردووە، ڕاگیرا. دواتر ڕاپۆرتی سیاسیی و تەشکیلاتی و ماڵیی کومیتەی سوئد لە لایەن هاوڕێیانی کومیتەوە پێشکەش کراو و بە تەئییدی هاوڕێیانی بەشدار گەیشت.
دواتر هاوڕێ عومەری ئیلخانیزادە سکرتێری گشتیی کۆمەڵە قسە و باسێکی پێشکەشی کونفرانسەکە کرد، هاوڕێ عومەر قسەکانی بە سپاس و قەدرزانی لە هەوڵ و چالاکییەکانی ئەندامان و کومیتەی سوئد دەست پێکرد و ئاماژەی بەوە کرد سەرەڕای کاری باش و جێگەی ڕێز کە کراوە دەرفەت و شانسی ئەوە هەیە کە کومیتەکانی کۆمەڵە و لەوانە کومیتەی سوئدیش دەتوانن و دەبی زیاتر لە زەرفییەتی خۆیان کەڵک وەرگرن بۆ پێشکەوتنی زیاتر.
هاوڕێ عومەر لەبەشێکی دیکەی باسەکەیدا ئاماژەی بە پێویستیی چاکسازی لە شێوازی کاری کۆمەڵە و کومیتە تەشکیلاتییەکانی کرد و وتی بۆ ئەوەی هەر جۆرە یەکگرتنێک و یەکخستنێک لە ماڵی کۆمەڵەدا سەرکەوتوو بێ پێویستە کۆمەڵەی زەحمەتکێشان خۆی بەهێزتر کا و چالاکییەکانی خۆی دەقیقتر کا و بە شێوەکاری نوێوە بێتە مەیدان.
هەوڵ بۆ چالاککردنەوەی ڕێکخستنەوەکانی ژنان و لاوان خاڵێکی دیکەبوو کە هاوڕێ عومەر ئاماژەی پێکرد و تەئکیدی لەسەر گرینگی و پێویستییەکەی کردەوە. هاوڕێ عومەر هەروەها وتی هەوڵ بۆ پەرەپێدانی کارەکانی کۆمەڵە و پێویستیی گەیاندنی دەنگی کۆمەڵە بە شاروناوچە جیاجیاکانی کردستان لە ڕێگەی هاوڕێیانێک کە ناسراوی و ئاشنایەتییان هەیە لەگەڵ هەرکام لەو ناوچانە هەیە، کارێکە کە پێویستە گرینگی زیاتری پێبدرێ.
گرینگیدان بە بزووتنەوە کۆمەڵایەتییەکان و کاری مەدەنی وەکوو عەرسەیەکی گرینگی کاری کۆمەڵە لە لایەن هاوڕێ عومەرەوە جەختی لەسەرکرایەوە و باس لەوە کرا کە کۆمەڵە لە سەرەتا چالاکییەکانی خۆیدا گرینگی بە کاری نێو خەڵک و کاری مەدەنی داوە و لەو ڕێگەیەوە توانیویەتی پێگەوجێگەی خۆی لەناو خەڵکدا بەهێزبکا و ببێتە هۆی بڕوای خەڵک بە ڕەوتە سیاسییەکە و کۆمەڵە وەکوو سازمان و حیزب.
سپاردنی کار بە لاوان و ئەو جیلە نوێیەی لە دەرەوەی وڵات گەورەبوون و شارەزای زمان و کولتووری وڵاتەکانی شوێنی نیشتەجێبوونی خۆیانن و هەوڵ بۆئەوەی ڕێگە خۆشکردن بۆ کاری ئەو کەسانە لە ڕوانگەی هاوڕێ عومەرەوە جێگای سەرنج و بەهاپێدان بوو.
لەبەشێکی دیکەی کونفرانسەکەدا هاوڕێیانی بەشدار سەرەنج و تێبینییەکانی خۆیان لە سەر ڕاپۆرتی کومیتە و وتەکانی هاوڕێ عومەر باس کرد و هەروەها پێشنیارەکانی خۆیان بۆ کاری داهاتووی ڕێکخراوی کۆمەڵە لە سوئد و هەروەها بە گشتی کاری کۆمەڵە بە ئاگاداری هاوڕێیان گەیاند، خاڵی سەرەکی ئەو قسانە پێویستی کاری زیاتر لە ناوخۆی ڕۆژهەڵاتی کوردستان و هەروەها پەیڕەوکردنی شێوازی کاری باشتر بۆ داهاتووی کاری کومیتە بوو.
لە کونفرانسەکەدا قسەوباسێک لە سەر دەور و ڕۆڵی ژنان لە کۆمەڵەدا کرا و ڕەخنە لەوە گیرا هەوڵەکان بۆ وەگەڕخستن و کەلک وەرگرتن لە هێزی ژنان و هاوڕێیانی ژنی ئەندامی کۆمەڵە کەم و ناتەواو بووە و پێویستە ڕێکارێ بۆ زیاتر خستنە گەڕی هێزەکان و زیندووکردنەوەی ڕێکخراوی ژنی کورد بەلەبەرچاوگرتنی پێویستیی بەردەوامبوونی کاری ئەو ڕێکخراوەیە کرا.
لەبەشی کۆتاییدا کومیتەی تازەی سوئد کە لە ٥ کەس پێکهاتووە هەڵبژێداو وبەو شێویە کۆنفراس کۆتایی پێ هات.
کۆمەڵەی زەحمەتکێشانی کوردستان :
کومیتەی سوئید.
19- 02 – 2017
