هاوڕێیان کەیوان فەرامەرزی لە کومیتەی پەیوەندییە نێونەتەوەییەکانی کۆمەڵە،
سەعدی موحەممەدپوور ئەندامی کومیتەی ناوەندی کۆمەڵە، ئەستێرە مورتەزایی هونەرمەند و چالاکی بواری مافی ژنان و دارێنە ساعەتی چالاکی بواری مافی مرۆڤ و مافی ژنان لە لایەن کۆمەڵەوە بەشدارییان لە کۆنگرەکەدا کرد.
کۆنگرەکە بە میوانداریەتی حیزبی سوسیالیستی کرێکاریی دەسەڵاتداری ئیسپانیا و بە بەشداریی زیاتر لە ۱۳٠ حیزبی سوسیالیست و پێشکەوتووخوازی زیاتر لە ۱٠٠ وڵاتی جیهان لە ڕۆژانی ۲٥ی مانگی نۆڤامبر تا ۲۷ی مانگی نۆڤامبردا بەڕێوە چوو.
پێدرو سانچێز سەرۆک وەزیران و سەرۆکی حیزبی سوسیالیستی کرێکاریی ئیسپانیا کۆنگرەکەی بە وتەیەک بۆ بەشداربووان کردەوە.
دواتر لوویس ئایالا سکرتێری پێشووی ئینتێرناسیۆناڵی سوسیالیست و جۆرج پاپاندرۆ سەرۆکی ئینتێرناسیۆناڵ وتەیان پێشکەشی بەشداربووان کرد.
لە کۆنگرەکەدا بە تێکڕای دەنگ خانمی بێنادیکتا لاسی لە جێگای لوویس ئایالا بوو بە سکرتێری گشتی و هەروەها پێدرۆ سانچێز سەرۆک وەزیرانی ئیسپانیا و سەرۆکی حیزبی سوسیالیستی کرێکاریی ئەو ولاتە لە جێگای جۆرج پاپاندرۆ بوو بە سەرۆکی ئینترناسیۆناڵی سوسیالیست.
لە ڕۆژی دووهەمی کۆنگرەکەدا کاتی تایبەت بۆ تاوتوێ کردنی بارودۆخی ژنان و مافی ژنان تەرخان کرا. زۆربەی وتەبێژەکان تیشکی تایبەتیان خستە سەر شۆڕشی ئەم دواییەی کوردستان و ئێران و بە وردی ئاماژەیان بە بەشداریی بەرینی ژنان لە شۆڕشەکەدا کرد و ڕۆڵی ژنانیان لە کوردستان و ئێراندا بەرز نرخاند. هاوڕێ ئەستێرە ژنە تێکۆشەری هونەرمەندی ڕیزەکانی کۆمەڵە و هەڵسووڕاوی بواری مافی ژنان وتارێکی بە زمانی فەڕانسەوی پێشکەش بە بەشداربوون کرد. دواتر هاوڕێ دارێنە تێکۆشەری بواری مافی ژنان و مافی مرۆڤ وتاری کۆمەڵەی بە زمانی ئینگلیسی پێشکەش بە بەشداربووانی کۆنگرەکە کرد. جێگەی باسە کە بە هۆی گرینگی و قورسایی باسەکە ماوەی زیاتر لە کاتی دیاریکراو بە تێکۆشەرانی ژنی نێو ڕیزەکانی کۆمەڵە درا. جێگەی ئاماژەیە کە وتارەکانی هاوڕێیان ئەستێرە و دارێنە لەگەڵ پێشوازی بەرچاوی بەشداربووان لە کۆنگرەکەدا بەڕەوڕوو بووە.
هاوڕێیانی کۆمەڵە لە پەراوێزی کۆنگرەکەدا چاوپێکەوتن و دانیشتنیان لەگەڵ چەند حیزب و کەسایەتی سیاسی بەشداری نێو کۆنگرەکە لەوانە پێدرۆ سانچێز سەرۆک وەزیرانی ئیسپانیا، لوویس ئایلا سەرۆکی پێشووی ئینترناسیۆناڵی سوسیالیست، جۆرج پاپاندرۆ سەرۆکی ئینتێرناسیۆناڵ ، دەستەی نوێنەرایەتی حیزبی سوسیالیستی فەڕانسە، حیزبی سوسیالیستی بێلژیک و حیزبی سوسیال دیموکراتی فینلاند کرد.
لە بەشێکی دیکەی کۆنگرەکەدا دەستەی نوێنەرایەتی کۆمەڵە دانیشتنیان لەگەڵ کۆمیتەی لاوانی ئینتێرناسیۆناڵی سۆسیالیست کرد و کۆبوونەوەیەکی ئانلاینیان لەگەڵ هاوڕێ ڕامیار ئیزەدی بەرپرسی لاونی کۆمەڵە لە دەرەوەی وڵات ڕێک خست.
جێگەی باسە کە لوویس ئایالا سکرتێری پێشووی ئینتێرناسیۆناڵی سوسیالیست و پاپاندرۆ سەرۆکی پێشووی ئینتێرناسیۆاڵ خۆشحاڵی خۆیان لەبابەت یەکگرتنەوەی ڕیزەکانی کۆمەڵە دەربڕی.
کۆمیتەی پەیوندییە نێونەتەوەییەکانی کۆمەڵەی شۆڕشگێڕی زەحمەتکێشانی کوردستانی ئێران
